Itsinda ry’Abadepite bari mu ruzinduko mu karere ryishimiye impinduka mu iterambere zishingiye ku bikorwa bitandukanye Akarere gakomeje kugeza ku bagatuye mu kwihutisha iterambere ndetse no kuzamura imibereho myiza y’abatuye .

Ibi babigaragaje kuri uyu wa 06 ugushyingo 2020 ubwo basozaga uruzinduko rwabo rw’iminsi 5 bagiriraga mu Karere kuva kuri uyu wa 2 kugeza ku wa 6 Ugushyingo 2020 aho basuye ibikorwa n’imishinga by’iterambere mu Mirenge ya Kanama,Rugerero ndetse na Rubavu bakanaganira n’ibyiciro by’Ubuyobozi bihagarariye baturage.

Muri iyi Mirenge aba Badepite barebaga uko abaturage bahanganye n'icyorezo cya COVID-19, uko amashuri yatangiye ndetse n’uburyo yiga yirinda COVID 19, Ibikorwa by’igihembwe cy'ihinga 2020A ndetse n’Imishinga migari igamije iterambere irimo nk’uwo kubungabunga icyogogo cy’Umugezi wa Sebaya ndetse no kubaka inyubako z’amashuri.

Aba badepite bashimye intambwe iri guterwa mu kwihutisha iterambere n’imibereho myiza y’abaturage ndetse n’uruhare rw’abaturage muri ibi bikorwa rutanga ikizere cyo uko bizasigasirwa bikazaramba.

Hn Mukabikino Jeanne Alliette wari uyoboye itsinda yagize ati:’’N’ubwo hari ingaruka icyorezo cya Covid 19 zagize ku mibereho n’ubuzima rusange bw’Abanyarwanda, ndetse by’umwihariko ku batuyte mu Karere ka Rubavu kubera ifungwa ry’imipaka turashima uburyo butandukanye bwakoreshejwe mu guhangana n’izi ngaruka z’iki cyorezo n’ubwo n’ubundi kitarangira dukwiye gukomeza kwirinda’’.

Yakomeje ashima ko bimwe bibazo bagaragarijwe mu Mirenge basuye hari icyo ubuyobozi bwabikozeho  yizeza ubuvugizi ku bikeneye uruhare rw’inzego zo hejuru mu kubikemura.

Umuyobozi w’Akarere Habyarimana Gilbert, yashimiye cyane uru ruzinduko rw’Abadepite kubera impanuro rusigira Akarere zituma karushaho kunoza ibikorwa bigamije kwihutisha iterambere n’imibereho myiza y’abaturage binagira uruhare mu kwesa Imihigo.

Yagize ati:’’ Dushima cyane izi ngendo z’abagize Inteko Ishingamategeko kuko zidusigira inama z’ingirakamaro ku buryo bwo kurushaho kunoza ibyo dukora kugira ngo birusheho kugirira akamaro abaturage dushinzwe umunsi ku wundi. Icyo tubizeza ni ukuzishyira mu bikorwa bityo twese tukihuta mu iterambere ntawe usigaye inyuma.’’

Itegeko Ngenga rigena imikorere y’Umutwe w’Abadepite riteganya ko bikozwe n’Abadepite bose, Umutwe w’Abadepite usura abaturage nibura kabiri mu mwaka, hagamijwe kumenya no kugenzura ibikorwa bya Guverinoma, kugira inama abaturage no kumenya ibibazo bafite no kubishakira ibisubizo.