URUBYIRUKO RUFITE INSHINGANO N’URUHARE RUKOMEYE MU KUBAKA AMAHORO - VISI MEYA DEOGRATIAS NZABONIMPA

Kuri uyu wa 30 Kamena 2026, mu kigo cya VJN, habereye Inteko Rusange y’Urubyiruko yitabiriwe n’urubyiruko rurenga 370, hagamijwe kungurana ibitekerezo ku buryo bwo guteza imbere uburenganzira n’inshingano by’abaturage, cyane cyane abakoresha imipaka, no kugira uruhare mu kubaka amahoro n’umutekano.

Iki gikorwa cyitabiriwe n’inzego n’abafatanyabikorwa batandukanye barimo Umuyobozi w’Akarere wungirije ushinzwe Iterambere ry’Ubukungu, Nzabonimpa Deogratias, DPCO, Umuhuzabikorwa wa DASSO, RIB, Pole Institute, MAJ, Umunyamabanga wa IBUKA, ndetse n’abahagarariye ibyiciro n’inzego zitandukanye z’urubyiruko.

Mu biganiro byari bigize iyi Nteko Rusange, habaye Panel Discussion yari igizwe n’abahagarariye DPCO, urubyiruko rwihangiye imirimo, MAJ, IBUKA na Pole Institute. Abitabiriye baganirijwe ku nsanganyamatsiko igira iti: “Gushimangira uburyo bwo kugera ku butabera binyuze mu guteza imbere uburenganzira n’inshingano by’abakoresha imipaka.”

Ibiganiro byibanze ku gukangurira urubyiruko kumenya no kubahiriza uburenganzira n’inshingano byabo, kwirinda ibikorwa binyuranyije n’amategeko, ndetse no kugira uruhare mu gukumira ibyaha byambukiranya imipaka. Urubyiruko kandi rwashishikarijwe kugira uruhare mu kubaka umutekano n’amahoro arambye mu gihugu no mu karere.

Muri iyi Nteko Rusange kandi habaye igikorwa cyo kuremera umuturage witwa Uwuburiza Mediatrice, utuye mu Murenge wa Nyamyumba, Akagari ka Busoro, Umudugudu wa Bushagi, mu rwego rwo kumushyigikira no kumufasha kuzamura imibereho ye.

Hanasinyweho umwanya wo gushimira abafatanyabikorwa bagize uruhare mu gushyigikira ibikorwa by’urubyiruko mu Karere ka Rubavu, hanashimirwa imirenge itatu yitwaye neza mu bikorwa by’urubyiruko. Imirenge yashimiwe ni Rubavu, Nyundo na Nyakiriba, ikaba yarahawe n’impamyabumenyi (certificates) z’ishimwe.

Mu gusoza iyi Nteko Rusange, Umuyobozi w’Akarere wungirije ushinzwe Iterambere ry’Ubukungu, Nzabonimpa Deogratias, yashimiye urubyiruko ku ruhare rukomeje kugira mu iterambere ry’Akarere n’igihugu, anaruha ubutumwa bwo gukomeza kwirinda amagambo n’ibikorwa bishobora kubiba urwango n’amacakubiri.

Yasabye urubyiruko kandi gukomeza kwirinda no kurwanya ibyaha byambukiranya imipaka, gukorana n’inzego z’umutekano no gukomeza kugira uruhare rugaragara mu kubaka amahoro, umutekano n’iterambere rirambye.