Minisitiri w'Ubucuruzi n'inganda akaba n'imboni y'Akarere ka Rubavu yifatanyije n’abatuye umurenge wa Gisenyi mu Gikorwa cyo Kwibuka ku nshuro ya 31 Jenoside yakorewe abatutsi mu gikorwa cyabereye ku rwibutso rwa Jenoside Yakorewe abatutsi rwa Commune Rouge. Mu butumwa yatanze yavuze ko dukwiye duharanira kwibuka kwiyubaka, twubaka Igihugu cyacu duhindura isura Igihugu cyambitswe n'abakiyoboye mbere n'abakoloni, tugahinduka Igihugu gishya.

Minisitiri w'Ubucuruzi n'Inganda yihanganishije ndetse akomeza abafite intege nke, agaragaza ko kwiyubuka bigomba kujyana no kwiyubaka ati “Iyo twibuka twubaka Igihugu bituma duca agasuzuguro tukiyubakira ubukungu, ntawe uduhitiyemo uko dukwiye kubaho. Turibuka amateka ashaririye twanyuzemo, turibuka uruhare Abanyarwanda bayagizemo, turibuka Politiki mbi yaranze igihugu cyacu ariko tukazirikana ko ari twe tugomba kongera kwiyubaka, tukubaka Igihugu tugahindura isura Igihugu cyacu cyambitswe n'abakiyoboye mbere n'Abakoloni, tugahinduka Igihugu gishya, tugahinduka ibyaremwe bishya.”

Yakomeje ahumuriza abacitse ku icumu asaba ko bakomeza kwitabwaho no kubakomeza ati “Tugomba gufata mu mugongo abafite intege nke; yaba iz'umubiri, iz'umutima, intege nke z'ubukungu tugakora ibishoboka byose kugirango dukomezanye uru rugendo. Iyo twibuka twiyubaka nk'Igihugu, tugomba kurushaho kubungabunga amateka n’ibikorwaremezo birimo; inzibutso za Jenoside Yakorewe abatutsi, ubusitani dushobora gukoresha twibuka, n'ubuhamya twumva mu bihe bitandukanye byo kwibuka, uko twiyubaka tukabungabunga n'aya mateka.” Yasabye ko amateka abantu bayumva kimwe, uburyo bwo kuyabungabunga, no guhagurukira rimwe mu kurwanya ingengabitekerezo ya Jenoside n'igisa nayo.

Yagize ati “Kwiyubaka bihera mu mitima, duharanira ko ikiza gitsinda ikibi. Iyo twiyubaka duhereye mu mibereho yacu n'imigirire. Imbaraga dufite nk'Abanyarwanda zigomba kugaragarira mu Gihugu cyacu. Igihugu cyacu ni Umurage nitwe tugomba kucyubaka, kandi ntitwacyubaka tudakundana, ikiza duharanira tugihurize mu kubaka Igihugu duhesha ishema Abanyarwanda.”