Kuri uyu wa Gatandatu, ubuyobozi bw’Akarere ka Rubavu bufatanyije n’inzego zitandukanye bwitabiriye umuganda rusange usoza ukwezi kwa Gicurasi 2025, wabereye mu Murenge wa Nyakiliba. Uyu muganda washyizweho intego yo gusibura no gutunganya umuhanda uva Nyakiliba ugana ku Igororero rya Rubavu.

Ni umuganda witabiriwe n’Umuyobozi w’Akarere ka Rubavu Bwana Mulindwa Prosper, Umuyobozi w’Akarere Wungirije Ushinzwe Imibereho Myiza Madamu Ishimwe Pacifique, Abadepite bari mu ruzinduko mu Karere ka Rubavu; Depite Rutebuka Balinda na Depite Mpembyemungu Winifride, hamwe n’inzego z’umutekano.

Muri uyu muganda hatangijwe ubukangurambaga ku isuku buharanira guteza imbere imibereho myiza y’abaturage, aho basabwe kugira isuku ku mubiri no mu kanwa, gutunganya aho baryama, gutekera ahasukuye, gukaraba amazi meza n’isabune, no kwirinda kujugunya imyanda ahatemewe.

“Isuku ni inkingi y’ubuzima bwiza. Uko tugira isuku iwacu ni ko turushaho kugira imiryango ibayeho neza. Turasaba buri muturage kugira uruhare mu isuku kuva ku mubiri kugera ku bidukikije bimukikije,” Mulindwa Prosper, Umuyobozi w’Akarere ka Rubavu.

Ku bufatanye n’ibitaro bya Gisenyi, abaturage bapimwe indwara zitandura, ndetse n’abatishoboye bahabwa ibikoresho by’isuku birimo ibiryamirwa n’ibikoresho byifashishwa mu buzima bwa buri munsi.

Madamu Ishimwe Pacifique, Umuyobozi w’Akarere Wungirije Ushinzwe Imibereho Myiza, yibukije ababyeyi inshingano zabo mu kurinda no kurera abana.

“Dufite inshingano zo kurinda abana bacu, tukabajyana ku ishuri kandi ntitubime amahirwe yo kwiga. Ni ngombwa ko dufatanya kurwanya inda ziterwa abangavu no kudahishira ababigizemo uruhare,” Ishimwe Pacifique, Visi Meya ushinzwe imibereho myiza.

Nyuma y'umuganda, Abadepite batanze ibiganiro bigamije gushimangira indangagaciro z’Ubunyarwanda no guteza imbere iterambere ry’umuryango. Basabye abaturage kugira uruhare mu kurandura ingengabitekerezo ya Jenoside no kwimakaza ubumwe n’ubwiyunge.

“Kwirinda amakimbirane mu miryango ni imwe mu nkingi z’iterambere. Dukeneye imiryango ifite ubumwe, ikora, itanga serivisi neza, kandi yita ku burere bw’abana,” Depite Rutebuka Balinda.

“Turakangurira buri wese gukunda umurimo no kuwunoza, gukoresha ikoranabuhanga mu kubona serivisi no guharanira kurandura imirire mibi n’igwingira mu bana,” Depite Mpembyemungu Winifride.

Ku bufatanye n'ibitaro bya Gisenyi abaturage bapimwe indwara zitandura hanatangizwa ubukangurambaga ku isuku, abaturage bakangurirwa kugira isuku ku mubiri no mu kanwa. Abatishoboye bahawe ibiryamirwa n'ibikoresho by'isuku byifashishwa mu buzima bwa buri munsi.