Kuri uyu wa Kabiri taliki yambere, Ukwakira 2024, nk’ahandi hose mu gihugu,  mu Mirenge yose igize Akarere ka Rubavu hizihijwe Umunsi Mpuzamahanga ngaruka mwaka w' abageze mu zabukuru, ufite insanganyamatsiko igira iti: AMASAZIRO MEZA, ISHEMA RY'ABAGEZE MU ZA BUKURU.

Ni umunsi usanzwe uba  mu rwego rwo kuzirikana abageze mu zabukuru no kwibutsa abakiri bato n'abandi babafite mu nshingano  ko kubafasha ari inshingano, by'umwihariko abageze mu zabukuru batishoboye.

Uyumunsi wizihirijwe mu murenge wa Mudende ku rwego rw’Akarere, wabayekandi umwanya wo gukangurira abaturage gukora ibikorwa bizatuma no mu gihe cy'izabukuru babaho neza bagasaza batandavuye ngo basabirize ku muhanda ahubwo bagasaza bisaba.

Ni umwanya nanone wo gushishikariza abageze mu zabukuru gukomeza kugira uruhare mu iterambere ry'Igihugu, no kugaragaza uruhare abageze mu zabukuru bagira muri iryo terambere kuzirikana abageze mu zabukuru nk'umurage ndangamuco nyarwanda.

Umuyobozi w’ Akarere wungirije ushinzwe imibereho myiza Madamu  Ishimwe Pacifique yasabye abakuze bo mu murenge wa Mudende gukomeza kugira inama urubyiruko kugira ngo rugire uburere n'indangagaciro zo kubaka Igihugu.

Yagize ati: “Babyeyi, tubafata nk'igicumbi cy'umuco n'indangagaciro, tuzirikana akamaro mwagiriye imiryango yanyu n'Igihugu muri rusange. Uyu munsi ureba buri wese, urubyiruko, abakuze n'abageze mu zabukuru, kuko kubaka Igihugu twese biratureba.

Yavuze kandi ko ubuyobozi buzakomeza kwita ku bageze mu zabukuru, cyane abafite amikoro make, bahuzwe na gahunda za Leta zo kurengera abatishoboye kugira ngo imibereho yabo ikomeze kuba myiza.

Yashimiye imiryango ifite abageze mu zabukuru, bakabagumana mu ngo zabo, bakabasazisha neza asaba n’abandi kubigira umuco kuko hari ndinda mubyeyi na ndinda mwana.

Yibukije abitabiriye uyu munsi, baba abakiri bato ndetse n’ abageze mu zabukuru gahunda nziza ya Ejoheza, kuko ariyo izabafasha gutegura amasaziro meza, bakazasaza badasabiriza.

Mu rweo rwo kuzirikana abageze mu zabukuru Akarere  karemeye abageze muzabukuru batishoboye aho bamwe kabahaye inka abandi bagahabwa  ibikoresho by’ isuku ndetse n’ ibiryamirwa mu rwego rwo kubafasha gukomeza kugira imibereho iboneye.

Abaremewe bashimiye ubuyobozi bukomeje kubasajisha neza bubagenera inkunga zitandukanye kuko bituma bumva ko bafite agaciro kandi ko Leta ibitayeho .

Ishimwe Pacifique yibukije ko turi mu gihe cyo guhangana n'ibyorezo birimo ubushita bw’ inkende na Marburg maze asaba abantu bose kugira umuco w'isuku, kugira ngo tubashe guhangana nabyo, bityo twese  tugire ubuzima bwiza buzatugeza mu zabukuru.