Kuri uyu wa Gatatu tariki ya 12/07/2023, Umuyobozi w'ikigo cy'igihugu gishinzwe umutungo kamere w'amazi mu Rwanda Dr. Emmanuel Rukundo, ari kumwe n'Umuyobozi w'Akarere w'agateganyo bwana NZABONIMPA Deogratias ndetse n'Itsinda ry'Abakozi n'abatekinisiye, bakomeje Igenzura ku mirimo yo kubaka no gusana ibyangijwe n'ibiza hirya no hino mu mirenge y'Akarere.

iri genzura n'isura ry'ibi bikorwa biri mu rwego rwo gukurikirana zimwe mu ngamba zafashwe nyuma y'ibyagombaga gukorwa mu buryo bwihuse birimo iyubakwa ry'ibikorwa remezo birimo ibiraro, Idamu igabanya amazi n'ibindi mu rwego rwo kurushaho guhangana n'ingaruka ziterwa n'ibiza ndetse no gufasha abaturage gusubira mu buzima busanzwe.

Haherewe ku byangijwe n'ibiza by'imvura n'inkangu iherutse kugwa, aba bayobozi basuye ibice by'Umurenge wa Kanama, Rugerero na Nyundo ahangijwe bikomeye n'amazi menshi ya Sebeya iherutse kuzuzwa n'amazi menshi ava mu misozi itandukanye mu ntara y'iburengerazuba bikangiriza Abaturage ndetse bamwe bakahasiga ubuzima.

Bimwe mu byasuwe, harimo ikiraro kiri kubakwa mu murenge wa Kanama ahazwi Kuri Mahoko, gihuza Umurenge wa Kanama na Nyundo. 

Abaturage bakoreshaga iki kiraro, bavuga ko kuba kiri gusanwa ndetse no kwagurwa bizaborohereza mu buhahirane bw'imirenge yombi, ndetse n'urujya n'uruza rw'abagenzi.

Ingamba zafatiwe bimwe mu bice byibasiwe n'Imyuzure y'imvura n'inkangu iherutse kugwa mu Karere, harimo n'izo kureba uko hakubakwa inkuta zitangira amazi, kubaka ibiraro birebire kandi bikomeye, Ubuyobozi ku mpande zombi bukaba bwasabye Rwiyemezamirimo ndetse n'abakozi muri rusange gukomeza gushyira imbaraga muri ibi bikorwa kugirango Abaturage bakomeze baloreshe iki kiraro mu gihe cya vuba.