Tariki 15 Ukwakira buri mwaka hizihizwa umunsi mpuzamahanga wahariwe umugore wo mu cyaro, Ubuyobozi bw'Akarere bwifatanyije n' abaturage hirya no hino mu mirenge igize Akarere ka Rubavu mu gikorwa cyo kwizihiza  uyu munsi ku nsanganyamatsiko y’ uyu mwaka igira iti "Ibidukikije, Ubuzima Bwacu".

Ni Umunsi waranzwe no kumurika ibikorwa by' Iterambere abagore bagezeho haba mu buhinzi, imirimo y’ ababoko ubukorikori no kubatera inkunga muri urwo rugendo rw’iterambere.

Ku rwego rw'Akarere uyu munsi wizihirijwe mu murenge wa Nyundo mukagari ka Nyundo witabirwa n'Umuyobozi w'Akarere wungirije ushinzwe imibereho myiza Madamu Ishimwe Pacifique n'abandi bafatanyabikorwa batandukanye.

Mu ijambo yagejeje ku bitabiriye ibi birori ku rwego rw’ Akarere  Umuyobozi wungirije ushinzwe imibereho myiza Ishimwe Pacifique yagarutse ku byo umugore wo mu cyaro agomba kwitaho kugira ngo agire umuryango mwiza, birimo isuku ku myenda no kumubiri, kwita ku bana no kubashyira mu ishuri.

 Yagize ati:”Turifuza ko umugore wo mucyaro agaragaza itandukaniro ry'uko agaragara ubungubu. Igihugu cyacu cyitaye ku guhindura imibereho y'abaturage bacu ariko bigahera ku myumvire, abantu bagomba guhindura imyumvire bakamenya ko ibintu byose bipfira mu myumvire.

Yasabye kandi abagore ku kitiranya uburinganire n’ ubwuzuzanye bw'umugore n'umugabo kugira ngo babashe kugera ku iterambere ry'urugo rwabo, asaba abagabo kudatererana abagore mu guharirana inshingano zo gutunga urugo bonyine.

Yasoreje ku mvugo ya ndongora nitunge imenyerewe muri aka Karere ko iharira ishingano abagore gusa abagabo bakigira ntibindeba, avugako umugabo afite inshingano zo gutunga no kubaka urugo, atanga Inama ko umugore n'umugabo bagomba gufatanya kubaka urugo bityo bagafatanya kugera ku iterambere.

Umuyobozi w’ Inama y’ igihugu y’abagore mu karere ka Rubavu Uwineza Chantal yahamagariye abagore bagenzi be by’ umwihariko abo mu cyaro ko bagomba gutekereza ku iterambere ryabo kuko nta munyarwanda ugomba gusigara inyuma, bakita ku isuku kuko byagaragaye ko isuku nke ishobora kuzana amakimbirane mu rugo imiryango igasenyuka

Muri ibi birori imiryango ikiri mu nzira y’ iterambere mu mirenge itandukanye,  imwe yaremewe igahabwa inka, indi ihabwa igishoro kibafasha kwiteza imbere, abandi bahabwa ibiryamirwa, nka matola, ibyo kwiyorosa, inkweto  n’ ibindi.